በኢትዮጵያ በድምቀት የሚከበሩት አብዛኛዎቹ በዓላት መሰረታቸው ሀይማኖታዊ ነው። ቡሄ፣ ገና፣ ፋሲካ፣ አረፋ፣ መስቀል፣ መውሊድ፣ አሸንዳ፣… እያልን ብንዘረዝር የቀደመ አባባላችንን ይበልጥ ያጠናክርልናል።

የክብረ በዓላቱ መነሻ ሐይማኖታዊ ይሁን እንጂ አከባበሩ ከባህላዊ ክዋኔ ጋር የተቀየጠ ነው። መሰረታዊውን ሐይማኖታዊ አስተምህሮ ሳይለቅ በባህላዊ እንቅስቃሴዎች ይደምቃል። እንደየስፍራው፣ እንደ ኑሮ ዘይቤው እና አስተሳሰቡ በሁሉም ዘንድ ይከበራል።

የዛሬው የዘመን እና ዘፈን ዝግጅታችን ትኩረት፡- በዓለም የማይዳሰስ ቅርስነት ስለተመዘገበው፣ የኢትጵያ ኦርቶዶክስ ካሏት ሁለት የአደባባይ በዓላት መካከል አንዱ ስለሆነው፣ ሐይማኖታዊ እና ባህላዊ ይዘት ስላለው፣… የጥምቀት በዓል ነው። በዓሉን በሀያማኖታዊ አስተምህሮ ትተን ባህላዊ ክዋኔዎቹን ተከትለን በዘፈን መነጽር ልንመለከተው እንጥራለን።

ከጥር 10 የሚጀመረው የጥምቀት በዓል እንደየአካባቢው ሁኔታ ጥር 21 ይጠናቀቃል። በከተራ ተጀምሮ በአስተርዕዮ ማርያም ፍጻሜውን ያገኛል። የበዓሉ ዋነኛ ክዋኔ የሆነውን የጸበል ርጭት ለማከናወን ይቻል ዘንድ ታቦታቱ ወደ ውሃማው ስፍራ ከሚጓዙበት እለት አስቀድሞ የአካባቢው ወጣቶች እና የደብሩ አገልጋዮች ዝግጅታቸውን የሚጀምሩት ዝማሬ ከመለማመድ፣ አካባቢዎችን ከማጽዳት፣ አልባሳት ከመግዛት ወይም የክት የሚሉትን አጥቦ ከማሰናዳት ነው።

ተመሳሳይ መልእክት እና ቀለም ያላቸው አልባሳትን በማሰራት በደቦ የማጌጥ ተግባርም ቀስ በቀስ ያደገ ነገር ግን ለበዓሉ ተጨማሪ ድምቀት የሰጠ ነው።