የሙዚቃ ቪድዮአቸው በዚህ ሳምንት ለዕይታ የሚበቃው ድምጻዊያን ከዚህ በፊት የሙዚቃ ስራቸውን በመተግበሪያው አማካኝነት የለቀቁት ግርማ ተፈራ እና ቴዎድሮስ ሞሲሳ ናቸው። ግማሽ አልበም (ኢፒ) ስራውን በሰዋሰው መተግበሪያ በኩል በያዝነው ሳምንት የሚያደርሰው ደግሞ በአማርኛ እና ኦሮምኛ ነጠላ ዜማዎቹ የሚታወቀው ድምጻዊ ኤቢ ማን ነው። 

ከ10 ቀን በፊት “ግን የትሀገር?” የተሰኘውን 15 ዘፈኖች የያዘ አልበም በሰዋሰው በኩል ለአድማጮቹ ያደረሰው ግርማ ተፈራ ካሳ “መርጦ ማፍቀር የለም” ለተሰኘው ሙዚቃ የቀረጸውን የሙዚቃ ቪድዮ በሰዋሰው በኩል ለሕዝብ ያደርሳል።

ድምጻዊ ቴዎድሮስ ሞሲሳም በተመሳሳይ “ወድጄሽ” የሚል መጠሪያ ላለው ሙዚቃው የተሰራውን የሙዚቃ ቪድዮ ለአድማጭ እንደሚያደርስ ታውቋል። ለሙዚቃው ኢንዱስትሪ ተክኖሎጂያዊ መፍትሔ ያመጣው ሰዋሰው መተግበሪያ በአፕ ስቶር እና በፕሌይ ስቶር ላይ በነጻ የሚገኝ በኢትዮጵያውያን የበለጸገ መተግበሪያ ነው። ጥራት ያላቸውን የሙዚቃ ሥራዎች እያገበያየ የሚገኘው “ሰዋሰው” ወደፊት ፖድካስቶች፣ ድምጸ መጻሕፍት (የመጽሐፍ ትረካ)፣ የሁነት ዝግጅቶች ላይ ለመሰማራት ቅድመ ዝግጅቱን አጠናቋል።