እንዲህ እንዲህ እያለ የሚቀጥለው ዘፈን የይሁዳን ታሪክ ለራሱ ዓላማ ተጠቅሞበታል።

የኤፍሬም ስዩም የይሁዳ ድልድይ እዚህ ላይ መነሳት የሚችል ነው። የይሁዳ ድልድይ እና ሌሎች ሃሳቦች በሚለው ሥራው ወስጥ ተካቷል።

‘‘እናንተ ከምታውቁት በላይ መሲሁን በአካልም በመንፈስም አውቀዋለሁ። በቃሉ ታማኝ እና ንጹህ፣ ያለማዳላትም ፍጥረቱን በእኩልነት የሚመለከት ቢኖር መሲሁ ብቻ ነው። ለዚህ ምስክሩም ከዋለበት የምውል፣ ካደረበት የማድር ከሌሎች ምስክሮች የምለይ፣ እኔ ይሁዳ ብቻ ነኝ። እኔ እንደሌሎቹ ጓደኞቼ ስለሱ መልካምነት ለመመስከር ስደት እና ረሃብ፣ እስራት እና ስቃይ አያስፈልገኝም። እንዲያውም ባልንጀሮቼ ከተቀበሉት መከራና ስቃይ የኔ ይልቃል’’ የይሁዳ ድልድይ ገጽ 201

የሚለው እኔ ባይ ገጸ ባህርይ በይሁዳ በኩል ያሉትን እውነቶች እያነሳ እምነታችንን ይፈትናል።

ደራሲ እንዳለ ጌታ ከበደ ‘ከጥቁር ሰማይ ስር’ በተሰኘ የአጫጭር ልቦለድ ስብስቦቹ ላይ ‘ይሁዳ’ የሚል ታሪክ አስፍሯል። ልብ ወለዱ የሚያጠነጥነው በተደረገበት መድኃኒት ምክንያት ራሱን የአስቆሮቱ ይሁዳ እንደሆነ ስላመነ ገጸ ባህርይ ነው። ደብተራው ገጸ-ባህርይ አብዝቶ ያስበው፣ ይሰብከው፣ ያስተምረው የነበረውን ሰው ሆነ። ወይም የሆነ መሰለው፡፡ እሱን መሆኑን አመነ። ጌታዬን ሸጥኩ እያለ ተጸጸተ፣… አብረውት ያሉ ተንኮል አሳቢ ሰዎች 30 ብሩን ይመልሱለታል። እናቱን ይቅርታ ይጠይቃል፣ ወዳጆቹን ምህረት ይለምናል።….

የደራሲ እንዳለ ይሁዳ በመጽሐፍ የምናውቀውን ይሁዳ እውነተኛ ታሪክ ሳይተው ወደ አሁን ዘመን አመጣው። በሌላ ሰው ገላ ውስጥ ጨመረው። በይሁዳ በኩል ያለን አመክንዮ በፈጠረው ታሪክ ውስጥ ጨምሮ አቀረበልን። ከጥቁር ሰማይ ስር በሚሰኘው መጽሐፍ ላይ የሚገኘው ታሪክ ሌሎችም ሸጋ አጭር ልብ ወለዶች ይዟል።

ኧርነስት ረኔ ጽፎት ሳህለሥላሴ ብርሃነማርያም የተረጎሙት ‘የኢየሱስ ሕይወት’ የተሰኘ መጽሐፍ በምድር የኖረውን ኢየሱስ ከታሪክ አንጻር ተመልክቷል። ከመተርጎሙ በፊት በርካታ ውዝግቦችን በእናት ቋንቋው ቢያስተናግድም የአማርኛው ትርጉም ብዙም ተጽእኖ ያሳደረ አልነበረም፡፡ ካህሊል ጅብራን የጻፈው ልብ ወለድም ይሁዳን ከእናቱ ወገን የተመለከተ ነው። የኢየሱስ እናትም የይሁዳ እናትም በእናትነት እኩል ናቸው ሲል እኩይን ከሰናይ አፋጦ የሞገተ ተወዳጅ ሥራው ነው፡፡ የይሁዳ እናት ፍረጂኝ ትላታለች፡፡ የኢየሱስም የይሁዳም እናቶች በእናትነት ለልጆቻቸው እኩል ናቸውና አንባቢን ክፉኛ የመንፈስ ሙግት ውስጥ ያስገባል፡፡